پنجاب ڈویلپمنٹ پروگرام کے تحت ترقیاتی کاموں کی مانیٹرنگ کا عمل جاری ہے، جبکہ سیکرٹری لوکل گورنمنٹ زید بن مقصود نے ضلع خوشاب کا دورہ کیا۔
دورے کے دوران ڈپٹی کمشنر خوشاب بھی ان کے ہمراہ موجود تھے، جبکہ خوشاب اور جوہرآباد میں جاری ترقیاتی منصوبوں کا تفصیلی جائزہ لیا گیا۔
اسسٹنٹ پراجیکٹ ڈائریکٹر نے سیوریج اور انفراسٹرکچر منصوبوں پر بریفنگ دی، جبکہ سیکرٹری لوکل گورنمنٹ نے شیوالہ ڈرین پر جاری ترقیاتی کام پر اطمینان کا اظہار کیا۔
بریفنگ میں بتایا گیا کہ ضلع خوشاب میں 12 ارب روپے سے زائد مالیت کے منصوبوں پر کام جاری ہے، جبکہ شیوالہ ڈرین اور سب برانچ کی ڈی سلٹنگ کا کام مکمل کیا جا چکا ہے۔
سیکرٹری لوکل گورنمنٹ کو بریفنگ میں مزید بتایا گیا کہ جوہرآباد میں دونوں انڈر گراؤنڈ سٹوریج ٹینکس مکمل کر لیے گئے ہیں۔
زید بن مقصود نے ہدایت کی کہ سٹوریج ٹینکس کی تکمیل کے بعد سڑکوں اور پارکس کی بحالی کا کام شروع کیا جائے۔
انہوں نے کہا کہ جوہرآباد میں منی سٹوریج ٹینکس کی تکمیل سے نکاسی آب کے نظام میں بہتری آئے گی، جبکہ ترقیاتی منصوبوں میں مقررہ معیار اور ٹائم لائنز پر سختی سے عمل کیا جائے۔
سیکرٹری لوکل گورنمنٹ زید بن مقصود نے کہا کہ پنجاب ڈویلپمنٹ پروگرام کے منصوبوں کی مانیٹرنگ باقاعدگی سے جاری رکھی جائے گی۔
