سندھ کے سینئر وزیر شرجیل انعام میمن کا کہنا ہے کہ زبردستی اور دھونس سے ن لیگ کو کشمیر میں الیکشن چوری کرنے نہیں دیں گے۔
نیوز کے مطابق پی پی رہنما شرجیل میمن کا کہنا ہے کہ ن لیگ اپنے بدمعاشوں اور غنڈوں کو لگام دے، ن لیگ سمجھتی ہے ہر کوئی بکاؤ مال ہے انہیں لالچ دے کر خرید سکتے ہیں، ن لیگ کے گلو بٹوں نے پی پی کے ایک ورکر کو شہید کرکے فاشسٹ روایت کو برقرار رکھا ہے۔
انہوں نے کہا کہ ن لیگ امیدواروں کے اسلحہ کے آزادانہ استعمال پر الیکشن کمیشن کی خاموشی افسوسناک ہے، ن لیگ اپنی شکست دیکھ کر اوچھے ہتھکنڈوں پر اتری ہوئی ہے۔
شرجیل میمن نے کہا کہ ن لیگ 2014 کی طرح کشمیر میں خیرات کا مینڈیٹ حاصل کرنا چاہتی ہے، خیراتی مینڈیٹ اور فارم 47 کی پیداوار ن لیگ کشمیر میں ماحول خراب کررہی ہے۔
پی پی رہنما نے کہا کہ کشمیری عوام پرامن ہیں اور وہ ن لیگ کے اوچھے ہتھکنڈوں سے واقف ہیں، ان کی قیادت کان کھول کر سن لے کشمیر کا پرامن ماحول خراب ہونے نہیں دیں گے۔
