ممبئی(22 اکتوبر 2026): بالی ووڈ اداکار ٹائیگر شروف کی گاڑی پر ہونے والی فائرنگ کے واقعے کی تحقیقات کے دوران سنسنی خیز انکشافات سامنے آئے ہیں۔
ممبئی پولیس کے مطابق اس معاملے میں گرفتار ملزمان نے ٹائیگر شروف کے علاوہ معروف اداکار رنبیر کپور کی باندرہ میں واقع رہائش گاہ کی بھی ریکی کی تھی۔ ممبئی پولیس نے فائرنگ کے اس واقعے کی تحقیقات کا دائرہ کار مزید وسیع کرتے ہوئے یہ جاننے کی کوشش شروع کر دی ہے کہ اس گینگ کے نشانے پر دیگر کون کون سے فنکار تھے۔
اس کے علاوہ، لارنس بشنوئی گینگ سے مبینہ طور پر جڑے ہوئے اسلحے کی غیر قانونی فراہمی کے نیٹ ورک کی بھی گہرائی سے تفتیش کی جا رہی ہے۔
میڈیا کی رپورٹس کے مطابق ممبئی پولیس نے عدالت کو بتایا ہے کہ ٹائیگر شروف پر حملہ مبینہ طور پر بشنوئی گینگ کے کارندے انیل پنڈت کی ہدایت پر کیا گیا، اور اس کیس میں اب تک مجموعی طور پر 8 افراد کو گرفتار کیا جا چکا ہے۔
پولیس ذرائع کا یہ بھی کہنا ہے کہ ملزمان کا اصل اور ابتدائی ہدف سپر اسٹار سلمان خان کو نشانہ بنانا تھا، جس کے لیے انہوں نے سلمان خان کی رہائش گاہ کی ریکی بھی کی تھی، تاہم گھر کے باہر پولیس سیکیورٹی اور اہلکاروں کی موجودگی کو دیکھ کر انہوں نے فی الحال یہ منصوبہ ترک کر دیا تھا۔
تحقیقات میں یہ بات بھی سامنے آئی ہے کہ ملزمان نے سوشل میڈیا پر موجود مداحوں کی پوسٹس کا باریک بینی سے جائزہ لیا تھا، جس سے انہیں معلوم ہوا کہ ٹائیگر شروف ہر اتوار جوہو کے ایک مخصوص فٹ بال گراؤنڈ جاتے ہیں جہاں ان کی سیکیورٹی نسبتاً کم ہوتی ہے۔ اسی معلومات کی بنیاد پر ملزمان نے انہیں نشانہ بنانے کا لائحہ عمل تیار کیا۔
دریں اثنا، ممبئی کرائم برانچ نے اس مقدمے میں ملوث تین اہم مرکزی ملزمان ریحان عرف سکّا، رتک کُرمی عرف روشن اور پھول سنگھ کو راجستھان کے شہر کوٹا سے گرفتار کر کے ممبئی منتقل کیا اور عدالت میں پیش کیا۔ عدالت نے تینوں ملزمان کو 31 اکتوبر تک پولیس ریمانڈ پر تحویل میں دے دیا۔
ممبئی پولیس کے ڈپٹی کمشنر راج تلک روشن نے میڈیا کو بتایا کہ اسلحے کی خریداری اور اس کی ترسیل کے نیٹ ورک کا سراغ لگاتے ہوئے مزید 5 افراد کو ہریانہ اور اتر پردیش سے حراست میں لیا گیا ہے۔
پولیس کے مطابق ان نئے گرفتار شدگان میں سے دو ملزم اسلحہ حاصل کرنے کے لیے بالخصوص امرتسر گئے تھے، جبکہ دو خواتین مبینہ طور پر ٹرین کے ذریعے اسلحہ چھپا کر ممبئی لے کر آئیں اور حملہ آوروں کے حوالے کیا۔
اس کے علاوہ ایک اور ملزم نے ممبئی ہی میں مقیم رہ کر حملہ آوروں کو مقامی سطح پر لاجسٹک سپورٹ اور دیگر سہولتیں فراہم کی تھیں۔ پولیس اس نیٹ ورک کے تمام تانے بانے ملانے کے لیے مزید تفتیش کر رہی ہے۔
