نئی دہلی(27 جولائی 2026): بھارتی کرکٹر ارشدیپ سنگھ نے پنجابی ماڈل اور اداکارہ سمرین کور کے ساتھ اپنے تعلقات کی تصدیق کردی ہے۔
بھارتی کرکٹر ارشدیپ سنگھ نے اداکارہ اور ماڈل سمرین کور کے ساتھ اپنے تعلقات کا اعتراف کرتے ہوئے ان کے مبینہ رومانوی تعلقات سے متعلق ہفتوں سے جاری چہ مگوئیوں کا خاتمہ کر دیا ہے۔ کرکٹر نے سوشل میڈیا پر ایک جذباتی پوسٹ کے ذریعے اپنے رشتے کا باضابطہ اعلان کیا ہے۔
View this post on Instagram
اتوار کے روز ارشدیپ نے سوشل میڈیا پر سمرین کور کے ساتھ دو تصاویر شیئر کیں جن میں جوڑے کو ایک دوسرے کے قریب دیکھا جا سکتا ہے۔ انہوں نے اس پوسٹ کے ساتھ سادہ سا کیپشن لکھا، ’’مائی پرسن‘‘ جس کے ذریعے انہوں نے پہلی بار عوامی سطح پر اپنے تعلقات کو تسلیم کیا ہے۔
سمرین کور کون ہیں؟
7 ستمبر 1999 کو جموں و کشمیر میں پیدا ہونے والی سمرین کور ایک اداکارہ، ماڈل اور سوشل میڈیا انفلوئنسر ہیں۔ انہوں نے پونے کے سمبیوسس کالج آف آرٹس اینڈ کامرس سے بی کام مکمل کرنے کے بعد ماڈلنگ اور اداکاری کی دنیا میں قدم رکھا۔
انہوں نے فیمینا مس انڈیا 2018 کے مقابلے میں جموں و کشمیر کی نمائندگی کی اور فائنلسٹ رہیں۔ اس کے علاوہ وہ زی فائیو کی ویب سیریز ’نیل پالش‘، فلموں ’83‘ اور ’سردار دار جی 2‘ کے ساتھ ساتھ جوبن نوٹیال، بادشاہ اور گرو رندھاوا جیسے نامور گلوکاروں کی موسیقی ویڈیوز میں بھی جلوہ گر ہو چکی ہیں۔
ارشدیپ اور سمرین کے تعلقات سے متعلق چہ مگوئیاں آئی پی ایل 2026 کے دوران اس وقت زور پکڑ گئی تھیں جب ایک وائرل اسنیپ چیٹ پوسٹ میں کرکٹر کو ایک خاتون کا ہاتھ پکڑے ہوئے دکھایا گیا تھا، جسے شائقین نے سمرین کور قرار دیا تھا۔
اس کے علاوہ سمرین کو ممبئی اور چنڈی گڑھ میں پنجاب کنگز کے میچز کے دوران اسٹیڈیم میں بھی بارہا دیکھا گیا تھا، جس نے ان افواہوں کو مزید ہوا دی تھی، تاہم اب ارشدیپ کے باضابطہ اعلان کے بعد تمام قیاس آرائیاں ختم ہو گئی ہیں۔
