پرتگال: دنیائے فٹبال کے اسٹار کھلاڑی کرسٹیانو رونالڈو نے بین الاقوامی فٹبال سے ریٹائرمنٹ کی خبروں کو مسترد کرتے ہوئے کہا ہے کہ وہ پرتگال کی قومی ٹیم کے لیے کھیلنے کا سلسلہ جاری رکھنا چاہتے ہیں۔
غیر ملکی میڈیا رپورٹس کے مطابق کرسٹیانو رونالڈو نے گزشتہ ہفتے ناروے کے خلاف میچ میں متبادل کھلاڑی رہنے اور ڈنمارک کے خلاف میچ میں بھی ابتدائی ٹیم میں شامل نہ کیے جانے کے بعد نیشنز لیگ کیمپ چھوڑ دیا تھا۔
انہوں نے کہا کہ پرتگالی فٹبال فیڈریشن کو ان کے اقدام کے نتائج کا جائزہ لے کر انہیں سزا دینی چاہیے اور وہ سزا کم کیے جانے کے حق میں نہیں ہیں۔ ان کے مطابق وہ اپنے اقدام پر معذرت کرچکے ہیں اور جانتے ہیں کہ ہر عمل کے نتائج ہوتے ہیں۔
تاہم رونالڈو نے کوچ جارج جیزس پر اعتماد توڑنے کا الزام عائد کرتے ہوئے کہا کہ کوچ نے پہلے انہیں ناروے کے خلاف کھلانے کا وعدہ کیا لیکن اس پر عمل نہیں کیا جس سے ان کے اعتماد کو ٹھیس پہنچی۔
رونالڈو نے کہا کہ اگر وہ جسمانی طور پر فٹ رہے، اپنی کلب ٹیم کے لیے کھیلتے رہے اور گول کرتے رہے تو وہ پرتگال کی نمائندگی جاری رکھنا چاہیں گے۔
اسٹار فٹبالر کا کہنا تھا کہ معطلی کی مدت ختم ہونے کے بعد وہ ہمیشہ کی طرح قومی ٹیم کے لیے کھیلنے اور کامیابی حاصل کرنے کے لیے دستیاب ہوں گے۔
واضح رہے کہ رونالڈو پرتگال کی جانب سے 234 میچز میں 146 گول کرچکے ہیں اور دونوں ہی عالمی ریکارڈ ان کے نام ہیں۔
