کراچی(17 جولائی 2026): اسپیشل انویسٹی گیشن یونٹ سی آئی اے کی کارروائی میں کالعدم ٹی ٹی پی فیضی گروپ کے 2 اہم کارندے مارے گئے۔
کراچی میں اسپیشل انویسٹی گیشن یونٹ سی آئی اے نے بھتہ خوروں کے خلاف ایک بڑی اور کامیاب کارروائی کی ہے، جس کے دوران کالعدم تحریکِ طالبان پاکستان کے کمانڈر فیض عرف فیضی گروپ کے دو انتہائی مطلوب کارندے ہلاک ہو گئے۔
ایس آئی یو حکام کے مطابق ہلاک ہونے والے ملزمان کی شناخت شیر خان عرف سہراب اور سعید محمد کے ناموں سے ہوئی ہے، اور دونوں ملزمان افغان شہری تھے۔
کارروائی کے دوران گرفتاری سے بچنے کے لیے ملزمان نے پولیس پر فائرنگ کر دی، جس پر پولیس کی جانب سے کی گئی جوابی فائرنگ میں دونوں ملزمان ہلاک ہو گئے۔ ہلاک ملزمان کے قبضے سے دو پستول اور بھتہ خوری کی وارداتوں میں استعمال ہونے والے موبائل فونز برآمد کر لیے گئے ہیں۔
پولیس حکام نے بتایا کہ ملزمان کراچی کے ایک ڈاکٹر اور نجی اسپتال کے مالک سے ایک کروڑ روپے بھتہ طلب کرنے کے مقدمے میں مطلوب تھے۔ اس بھتہ خوری کا مقدمہ رواں سال 5 جولائی کو کراچی کے علاقے کوئٹہ ٹاؤن میں درج کیا گیا تھا۔
تحقیقات کے مطابق ہلاک ملزمان افغانستان میں بیٹھے کالعدم ٹی ٹی پی کے کمانڈر فیض محمد عرف فیضی سے براہِ راست رابطے میں تھے اور اسی کے اشارے پر کارروائیاں کرتے تھے۔
پولیس نے بھتہ خوری سے متعلق اہم شواہد اور ملزمان کے زیرِ استعمال موبائل فونز کو تحویل میں لے لیا ہے۔ پولیس کا مزید کہنا ہے کہ ہلاک ملزمان کے خلاف پہلے سے بھی بھتہ خوری اور اقدامِ قتل کے متعدد مقدمات درج تھے۔
