تہران(22 اگست 2026): ایران نے امریکا کی جانب سے ایران پر نئی اقتصادی پابندیوں کے اعلان پر شدید ردعمل کا اظہار کیا ہے۔
ایرانی وزارتِ خارجہ کے ترجمان نے امریکا کی جانب سے ایران پر نئی اقتصادی پابندیوں کے اعلان پر شدید ردعمل کا اظہار کرتے ہوئے اسے محض ایک ملک کے خلاف مسلسل غیر قانونی اقتصادی جنگ قرار دینے سے ناکافی قرار دیا ہے۔
ترجمان نے سوشل میڈیا پلیٹ فارم ایکس پر اپنے بیان میں کہا کہ یہ امریکی اقدام اقوام متحدہ کے ہر آزاد رکن ملک پر ماورائے علاقائی خودمختاری مسلط کرنے کا دعویٰ ہے۔
انہوں نے کہا کہ کوئی بھی ریاست قانونی طور پر غیر ملکی بینکوں، کاروباری اداروں یا ہوائی اڈوں کو کسی تیسرے ملک کے ساتھ قانونی تجارت ترک کرنے پر مجبور نہیں کر سکتی۔
بیان میں مزید کہا گیا کہ کسی بھی ملک کے بینک، کاروباری ادارے اور ہوائی اڈے صرف اپنے ملکی قوانین اور ضوابط کے تحت کام کرتے ہیں، اور اس طرح کی ثانوی پابندیوں کی بین الاقوامی قانون میں کوئی بنیاد نہیں ہے۔ یہ اقدامات اقوام متحدہ کے چارٹر میں درج ریاستوں کی خودمختار مساوات کے اصول کی صریح خلاف ورزی ہیں۔
ترجمان ایرانی وزارتِ خارجہ کا کہنا تھا کہ کسی خودمختار ریاست کو اپنی قانونی پالیسی کے فیصلوں میں تبدیلی پر مجبور کرنے کے لیے اقتصادی دباؤ ڈالنا بین الاقوامی طور پر ایک غلط اقدام ہے۔ ایسے اقدامات ریاستوں کی خودمختاری کو ختم کر کے دنیا کو دوبارہ نوآبادیاتی نظام کی طرف دھکیل سکتے ہیں۔
